Kur mësova se intership-i im do të ishte në Tiranë, për të qenë plotësisht e sinqertë, nuk isha shumë e emocionuar. Në të vërtet, në Itali kemi një ide të gabuar për Shqipërinë, por do t’i rikthehem më vonë kësaj teme në këtë artikull.

Para së gjithash, duhet të dini se unë jam Chiara Anzuino, një studente italiane që pata mundësinë të kaloj një muaj të tërë duke punuar në Tiranë, falë programit Erasmus Plus të Bashkimit Evropian, në muajin e parë të vitit të katërt të shkollës së mesme.

Edhe pse kam qenë këtu për vetëm 1 javë, dua që ju ta ndjeni se si është ky qytet nga sytë e një studenteje të re, e cila gjithmonë ka jetuar me idenë e Shqipërisë si një vend i rrezikshëm dhe i pazhvilluar, por që tani për fat po e ndryshon mendjen e saj.

Në këtë artikull do të paraqes të gjitha argumentet për të cilat duhet ta konsideroni Tiranën si një destinacion për udhëtimet tuaja të ardhshme, së bashku me disavantazhet që ka aktualisht ky qytet.

Për ta nisur me këmbë të mbarë, le të flasim për atë që me të vërtetë më pëlqeu në kryeqytetin e Shqipërisë.

Gjëja e parë që nuk mund të injoroja është koha në stilin e jetesës këtu. Kështu, më duket i mahnitshëm fakti që mund të ha në çdo restorant në kohën që preferoj, për shembull, në Tiranë, mund të ecësh lehtësisht në qendrën e qytetit në orën 11 të natës dhe të gjesh kaq shumë restorante të hapura ku po darkojnë. Mund t’ju siguroj se kjo anë pozitive nuk është aq e zakonshme, pasi në qytetet e mëdha është mjaft e vështirë për të ngrënë në kohën kur jeni mësuar ta bëni atë si një turist italian.

Për të vazhduar me gjërat më të mira në Tiranë, argumenti tjetër për të cilin duhet të vizitoni këtë vend, është zgjedhja masive e restoranteve, klubeve dhe aktiviteteve që mund të bëni.

Thjesht mendoni për faktin se në vetëm 7 ditë kam qenë tashmë në një natë të mrekullueshme karaoke në një pub autentik irlandez, në një restorant tradicional të mrekullueshëm ku kishte një bandë shqiptare që kërcente dhe këndonte për të gjithë njerëzit që darkonin atje, në një dhomë arratisjeje, në një kinema romantike në qiell të hapur dhe në shumë vende të tjera super të mrekullueshme, duke përfshirë dhe qendrën e bukur të qytetit.

Si mund të harroj një nga anët pozitive më të mëdha të Tiranës? Natyrisht, po flas për çmimet e saj të lira. Këtu mund të darkoni lehtësisht në restorant me 6/7 €,  të hani akullore për vetëm 1 € dhe madje të përjetoni momentet më të bukura me 10 €! A nuk është e mrekullueshme?

Për të përfunduar me gjërat më të mira të këtij qyteti, do të doja të theksoja mirësinë dhe mikpritjen e shqiptarëve, pasi shpeshherë bëjnë gjithcka që duhet për t’ju bërë të ndiheni të mirëpritur në vendin e tyre.

Gjithsesi, meqenëse dua t’ju jap një pamje të plotë të Tiranës, le të diskutojmë për atë që nuk më pëlqen shumë këtu, pasi si në të gjitha qytetet e tjera, ka disa anë negative që nuk do të doja t’i injoroja.

Disavantazhi i parë që vura re këtu në Tiranë është mungesa e një rrjeti transporti efikas.

Në të vërtetë, këtu, nuk është e mundur të përdorësh Uber, biçikleta elektrike ose transportin nëntokësor; e vetmja mënyrë për të lëvizur nëpër qytet janë autobusët, që në disa momente janë shumë të mbushur, ose në këmbë, duke përfshirë gjithashtu edhe skuterët elektrikë që mund t’i merrni me qira në qendër, por unë nuk do t’jua rekomandoja shumë këto, pasi  njerëzit nuk i ngasin në një mënyrë të sigurt… Vetëm kini kujdes kur të kaloni rrugën, edhe nëse semafori është i gjelbër për ju.

Megjithatë, një nga aspektet më të këqija të Tiranës, është fakti që një mori biznesesh këtu nuk e pranojnë kartën e kreditit, por duan që të paguani me para në dorë, dhe kjo nuk është dhe aq komode për një turist.

Gjithashtu duke qenë se jam dhe një adhuruese blerjesh, duhet të them se këtu pazari është mjaft mediokër, me të vërtetë, është e vështirë t’i gjesh të gjitha dyqanet që vizitojmë në vendet perëndimore, por edhe nëse mund të gjesh një markë të njohur, ka të ngjarë që cmimet të jenë më të larta, pasi Shqipëria nuk është anëtare e Bashkimit Evropian.

Si përfundim, do t’ua rekomandoja Tiranën të gjithë atyre njerëzve që duan të hanë mirë, të argëtohen, të shpenzojnë më pak dhe të shijojnë një kulturë të re.

Tani, mezi pres të zbuloj më shumë për këtë qytet të bukur dhe befasues!