Galeria GOCAT ka kënaqësinë të njoftojë hapjen e ekspozitës “Unidentified False Objects – UFO” nga artisti i mirënjohur Ardian Isufi.

Kërkimi i Ardian Isufit nis nga çështje akute, midis utopisë dhe distopisë. Në këtë ekspozitë konceptuale, evolucionare në vendndodhje, përmbajtje dhe formë, duke përfshirë një kombinim të mediumeve si video, instalacion e ndërhyrje në hapësirë, “U.F.O.” kthehet në një rrugëtim artistik, ku natyra shëtitëse dhe performuese e veprave ka një matricë të dallueshme bashkëkohore.

Kjo ekspozitë që përmbyll kalendarin artistik të vitit 2024 në Galerinë ‘GOCAT’, është dukshëm një qasje e zgjeruar në raport e dialog me shoqërinë, historinë, e kulturën, ku përballja e artistit me realitetin shqiptar, sado radikale dhe e drejtpërdrejtë, është njëkohësisht ndërvepruese me publikun, hapësirën e kohën.